269859357_3114604888755245_7784201903439370543_n

ნინო ნაყეური ფშაური სასიმღერო ფოლკლორის გადასარჩენად

ფოლკლორული მოგზაურობა ფშავში - ესაა სახელწოდება პროექტისა, რომელიც ნინო ნაყეურმა ფშაური სასიმღერო ფოლკლორის გადასარჩენად მოიფიქრა. ბოლო სამი წელია ახალგაზრდა ხელოვანი გოგონა ფშავსა და არხოტის ხეობაში ექსპედიციებს ახორციელებს.
,,გალობის უნივერსიტეტის სტუდენტებთან ერთად აღვადგინე და წარმოგიდგენთ აქამდე უცნობ, 10 ფოლკლორულ ნიმუშს კონცერტის სახით. ეს დღე ძალიან მნიშვნელოვანია ფშაური ფოლკლორის პოპულარიზაციისათვის. ჯერ დასაწყისია, ფშავში იმდენი საინტერესო მიმართულებაა...“, - ამბობს ნინო ნაყეური.


269909685_3114605128755221_277559798727647633_n
სახელებითა და გვარებით გაგაცნობთ პროქტში ჩართულ თითოეულ მონაწილეს: ნინო ნაყეური, ზურა მამუკელაშვილი, თათია ლეგაშვილი, ქეთი ტაბახმელაშვილი, ანი რობაქიძე, მირანდა წამალაშვილი, ავთო ტოჩილაშვილი, თამაზ ელისაშვილი, გიორგი ბაზერაშვილი, ნიკა ბორჩხაძე, სანდრო გორგილაძე, ანდრია მარკოზაშვილი, მიშო ხაჩიძე, ნიკა ჯოხაძე.
სპეციალურად ამ დღისთვის, ,,ფერხისას“ შესასრულებლად, ფშავიდან, სოფელ მაღაროსკარიდან ჩამოვიდნენ მოწვეული სტუმრები: 80 წლის ეთნოფორი - ვალიკო წოწკოლაური და 12 წლის ახალაზრდა მომღერალი - გიორგი მუშტაშვილი.
ფოლკლორის ცენტრისთვის უმთავრესია მსგავს პროექტებს, აქტიურ ახალგაზრდებს, განსაკუთრებით რეგიონებიდან, მხარი დაუჭიროს და დაეხმაროს მათ შედეგის პოპულარიზაციაში. მადლობას ვუხდით ნინო ნაყეურს და პროექტში ჩართულ თითოეულ ახალგაზრდას, იმ ორგანიზაციებს, რომელთა ხელშეწყობითაც განხორციელდა პროექტი.


269907685_3114604478755286_8895392244548628439_n
პროექტის ფარგლებში, ფოლკლორის ცენტრის დარბაზში აქამდე უცნობი ფშაური ფოლკლორული ნიმუშების აუდიო-ვიდეო ჩაწერა განხორციელდა. აღსანიშნავია, რომ ათივე ნიმუში პირველად შესრულდა სცენაზე.
გთავაზობთ ფშაური ფოლკლორული ნიმუშების ჩამონათვალს: ცეკვა ფშაური - გარმონზე, ჯვარიწინასა, ფშაური ხმით ტირილი, მინდია, ფერხისა, ფშაური სალაღობო, ქალავ ვინ მოგცა შვენება, ქალ-ვაჟური, ფშაური სათამაშო - ფანდურზე, ფშაური სუფრული - სიმღერას ბანი უხდება.


269835615_3114603618755372_4465223950634052389_n


მსმენელებს შესაძლებლობა ექნებათ სოციალურ სივრცეში გაეცნონ ფშაური ფოლკლორული ნიმუშების ჩანაწერს, ასევე, ახლო მომავალში, ფოლკლორის ცენტრის დარბაზში იგეგმება ამ პროექტის ფართო საზოგადოების წინაშე კონცერტით წარდგენა.
ნინო ნაყეურის წამოწყების მხარდამჭერები არიან გიორგი მთაწმინდელის სახელობის საეკლესიო გალობის უმაღლესი სასწავლებელი; დუშეთის მუნიციპალიტეტის მერია, კულტურის სამსახური და ფოლკლორის სახელმწიფო ცენტრი.